තාජුඞීන් ඝාතනය: යෝෂිත රාජපක්ෂ CIDට පැමිණෙයි

හිටපු ජනාධිපති මහින්ද රාජපක්ෂයේ  පුත් යෝෂිත රාජපක්ෂ අපරාධ පරීක්ෂණ දෙපාර්තමේන්තුව වෙත අද (16) උදේ පැමිණියා. ඒ, රග්බි ක‍්‍රීඩක වසීම් තාජුඞීන්ගේ ඝාතනය සම්බන්ධයෙන් සිදු කෙරෙන පරීක්ෂණවලට අදාළ ප‍්‍රශ්න කිරීමක් සඳහායි.  රථයක වර්ණය වෙනස් කිරීම සම්බන්ධයෙන් වූ පරීක්ෂණයකට අදාළව ප්‍රකාශයක් ලබාගැනීම සඳහා අද දිනයේ එම කැඳවීම සිදුකර ඇති බව යෝෂිත රාජපක්ෂ මහතා පවසයි.

කෙසේ වෙතත් තාජුඩීන් ඝාතනයට අදාළව සිදු කළ පරීක්ෂණවලදී සිරිලිය සවිය සංවිධානයට අයත් ඩිෆෙන්ඩරයක් හමුවූ අතර ඒ පිළිබඳව සිදු කළ දීර්ඝ විමර්ශනවලදී අනාවරණය වී තිබුණේ එම ඩිෆෙන්ඩර රතු කුරුස සංවිධානය විසින් සමාජසේවා අමාත්‍යාංශයට ලැබුණු ඩිෆෙන්ඩරයක් බවය. එම අමාත්‍යාංශය මගින් සිරිලිය සවිය සංවිධානය වෙත ලබා දී තිබී ඇති අතර පසුව එය යෝෂිත රාජපක්ෂ මහතාගේ පරිහරණය සඳහා යොදාගෙන ඇත. එම ඩිෆෙන්ඩරයේ ලේ පැල්ලම් කිහිපයක් තිබූ බවත්, වරින් වර එහි වර්ණය වෙනස් කර ඇති බවත් අපරාධ පරීක්ෂණ දෙපාර්තමේන්තුව කල පරීක්ෂණවලදී අනාවරණය විය.

 මේ අතර හිටපු ජනාධිපතිවරයාගේ ආර්යාය වු ශිරන්ත රාජපක්ෂ මහත්මිය ඊයේ (15) දිනයේදී අපරාධ පරීක්ෂණ දෙපාර්තමේන්තුව පැමීණ මෙම සිද්ධියට අදාළව ප්‍රකාශයක් ලබා දීමට කටයුතු කළේය.