ශ්රී ලංකා – ඇෆ්ගනිස්තාන ඩුබායි ක්රිකට් තරග ශ්රී ලංකාවට ගෙන එන්න සැලසුමක්
මැදපෙරදිග මතුව ඇති යුද වාතාවරණය හේතුවෙන් ඩුබායිහිදී මේ මස 13 වැනිදා ආරම්භවීමට නියමිත ශ්රී ලංකා – ඇෆ්ගනිස්තාන එක්දින හා විස්සයි20 ක්රිකට් තරගාවලිය ශ්රී ලංකාවේ පැවැත්වීමට අවධානය යොමුව තිබේ.
මේ සම්බන්ධයෙන් ශ්රී ලංකා – ඇෆ්ගනිස්තාන ක්රිකට් ආයතන සාකච්ඡා පවත්වමින් සිටින අතර, ඉදිරි දින දෙක තුළදී ස්ථීර තීරණය ප්රකාශයට පත් කිරීමට නියමිතය. මාර්තු 13 වැනි දින පැවැත්වෙන තරගාවලිය වෙනුවෙන් ශ්රී ලංකා පිල මේ මස 10 වැනිදා එක්සත් අරාබි එමීර් රාජ්ය බලා පිටත්ව යෑමට සැලසුම් කොට ඇති අතර, මැදපෙරදිග මෑතකාලීන ආතතීන් තරගාවලිය පැවැත්වීමට බාධාවක් වී තිබේ.
ඇෆ්ගනිස්තාන ක්රිකට් මණ්ඩලයේ සත්කාරකත්වයෙන් පැවැත්වෙන මේ තරගාවලියේ විස්සයි20 තරග තුන සාජාහිදීත්, එක්දින තරග ඩුබායිහිදීත් පැවැත්වීමට කටයුතු යොදා ඇත. අවසන් වරට දෙපිල ද්විපාර්ශ්වික තරගාවලියකදී මුණගැසුණේ 2024 මුල් භාගයේදී, ඇෆ්ගනිස්තානය ශ්රී ලංකාවේ සංචාරය කළ අවස්ථාවේදීය. එම අවස්ථාවේදී, ශ්රී ලංකාව තරගාවලි දෙකම ජයග්රහණය කළ අතර, එක්දින තරග 3-0ක් ලෙස හා විස්සයි20 තරගාවලිය 2-1ක් ලෙස සටහන් විය.
මේ අතර, අබුඩාබි සයිඩ් ක්රිකට් ක්රීඩාංගණයේ පෙරේදා පැවැත්වීමට නියමිතව තිබූ පාකිස්තාන ෂහීන්ස් සහ එංගලන්ත ලයන්ස් අතර දෙවැනි එක්දින තරගය මැදපෙරදිග මතුව ඇති යුද උණුසුම හේතුවෙන් අවලංගු කරන ලදි. එංගලන්ත කණ්ඩායමට නැවත සිය රට බලා යාමට අවශ්ය බවත් ගුවන් ගමන් අවලංගු කිරීම හේතුවෙන් එංගලන්ත ලයන්ස් කණ්ඩායමේ පුහුණුකරු ලෙස අබුඩාබිහි සිටින එංගලන්ත ක්රිකට් ක්රීඩක ජොනී බෙයාර්ස්ටෝ එක්සත් රාජධානියේ අගමැති කීර් ස්ටාර්මර් මහතාගෙන් උදවු ඉල්ලා සිටියේය. “ඔබට අපව ගෙදර ගෙන යා හැකිද?” බෙයාර්ස්ටෝ එක්සත් රාජධානියේ අගමැති කීර් ස්ටාර්මර් මහතා වෙත ‘එක්ස්’ පණිවිඩයක් නිකුත් කළේය.
මැදපෙරදිග යුදමය තත්ත්වය ක්රීඩා ක්ෂේත්රයට අහිතකර බලපෑමක් ඇති කර තිබෙන අතර, පාපන්දු සහ ක්රිකට් ඇතුළු ක්රීඩා කිහිපයක කාලසටහන් දැනටමත් උඩු යටිකුරු කර ඇත. තත්ත්වය ඉක්මනින් පාලනය නොවුණහොත්, ඉදිරි දිනවලදී තවත් කාලසටහන් කිහිපයක් කල් දැමීමට හෝ අවලංගු කිරීමට ඉඩ ඇත.
ආසියානු පාපන්දු සම්මේලනය (AFC) මැදපෙරදිග පැවැත්වෙන මහාද්වීපික සමාජ ශූරතාවලියේ මෙම සතියේ පැවැත්වීමට නියමිතව තිබූ ප්ලේ-ඕෆ් තරග සියල්ල කල් දමා තිබේ. ආසියානු චැම්පියන්ස් පාපන්දු ලීග් බටහිර කලාප කන්ඩායම් 16 වටයේ තරග කල් දමා ඇති බව ආසියානු පාපන්දු සම්මේලනය නිවේදනයක් නිකුත් කරමින් කියා සිටියේය.
මේ අතර, ඉරානය, පර්සියානු ගල්ෆ් ප්රෝ ලීගයේ තරග කල් දමා ඇත. කටාර්හි කටාර් ස්ටාර්ස් ලීග් තරගය අවලංගු කර ඇත. එක්සත් අරාබි එමීර් රාජ්යයේ ගුවන් ගමන් අත්හිටුවා ඇති හෙයින් ඉන්දියාවේ සහ ශ්රී ලංකාවේ පැවැත්වෙන විස්සයි20 ලෝක කුසලානයට සම්බන්ධ ක්රීඩකයන්, කණ්ඩායම් කළමනාකරුවන්, තරග නිලධාරීන්, විකාශකයන් සහ සංවිධායක කාර්ය මණ්ඩලයේ ගමන් සහ ආරක්ෂාව සහතික කිරීම සඳහා හදිසි සැලසුම් ක්රියාත්මක කිරීමට අයිසීසීය පියවර ගෙන ඇත.
මැදපෙරදිග අර්බුදය ෆෝමියුලා වන් මෝටර් රථ තරගාවලියටද බලපා ඇත. ඩේලි මේල් පුවත්පතට අනුව, ඔස්ට්රේලියානු ග්රොන් ප්රී තරගාවලිය සඳහා මෙල්බර්න් බලා යන ක්රීඩක ක්රීඩිකාවන්ට ගුවන් ගමන් අවලංගු කිරීම බලපෑම් කොට ඇත. දෝහා සහ ඩුබායි ගුවන්තොටුපොළ වසා දැමීමෙන් පසු මෙල්බර්න් ග්රොන් ප්රී තරගාවලියේ කණ්ඩායම් සහ කාර්ය මණ්ඩලය 2,000කට ආසන්න සංඛ්යාවකට ඔවුන්ගේ ගමන් මාර්ග වෙනස් කිරීමට සිදුව තිබේ.