මෛත්රීගේ කාර්ය මණ්ඩල ප්රධානී සහ දැව සංස්ථා සභාපති රිමාන්ඩ්
කන්තලේ සීනි සමාගමට අයත් යන්ත්ර සූත්ර සහ ගොඩනැගිලි පවරා දීමට අනුමැතිය ලබා දීමට පෞද්ගලික සමාගමකින් අල්ලස් වශයෙන් රුපියල් කෝටි 54ක් ඉල්ලා ඉන් රුපියල් කෝටි දෙකක් ලබා ගත් බව කියන ජනාධිපති මෛත්රිපාල සිරිසේන මහතාගේ කාර්ය මණ්ඩල ප්රධානී ආචාර්ය කුසුම්දාස මහානාම මහතා සහ රාජ්ය දැව සංස්ථාවේ සභාපති පී දිසානායක මහතා ලබන නව වැනි දා තෙක් රිමාන්ඩ් කරන ලදි. ඒ, සැකකරුවන් කොළඹ ප්රධාන මහේස්ත්රාත් ලාල් රණසිංහ බණ්ඩාර මහතා හමුවට ඉදිරිපත් කිරීමෙන් අනතුරුවයි.එහිදී මහේස්ත්රාත්වරයා නියෝග කර ඇත්තේ ඔවුන් ලබන 9 වනදා දක්වා රක්ෂිත බන්ධනාගාර ගත කිරීමටයි.
කොළඹ හෝටලයකදී අල්ලස් හෝ දූෂණ චෝදනා විමර්ශන කොමිෂන් සභාවෙන් අත්අඩංගුවට ගත් සැකකරුවන් දෙදෙනා ඊයේ(03) මධ්යම රාත්රී 12ට පමණ මහේස්ත්රාත්වරයාගේ නිල නිවසට ඉදිරිපත් කරනු ලැබීය.
මෙම සිද්ධියට අදාළව අල්ලස් හෝ දූෂණ විමර්ශන කොමිසම වෙත පැමිණීල්ලක් ඉදිරිපත් කර තිබුණේ නො. 27/9, රොස්මිඞ් පෙදෙස, කොළඹ 07 ලිපි නැති එම්. ජී. ෂුගර් ලංකා පුද්ගලික සමාගමේ ප්රධානී කොටහා රාලහල්ලී කොඩි ඩප්පයියා නඩරාජා නැමැති ඉන්දීය ජාතිකයා විසිනි.
ශි්ර ලංකා ආයෝජන මණ්ඩලයේ ව්යාපෘතියක් වශයෙන් එම්. ජී. ෂුගර් පුද්ගලික සමාගම වෙතට රජය මගින් පවරා දී ඇති කන්තලේ සීනි සමාගමකට අයත් යන්ත්ර සුත්ර සහ ගොඩනැගිලි පවරා දීම සදහා අනුමැතිය ලබා දීමට අල්ලස් වශයෙන් රුපියල් මිලියන 540 ක් ඉල්ලා එය රුපියල් මිලියන 100 ක් දක්වා අඩුකර අත්තිකාරම් වශයෙන් රුපියල් මිලියන 20 ක් අල්ලස් මුදලක් ඉල්ලා ලබාගත්තේ යැයි සැකකරුවන් දෙදෙනාට එරෙහිව අල්ලස් කොමිසම චෝදනා නගා ඇත.