රජයේ උත්සහය ඵල දරයි! අනෝජන්ට පනවා තිබූ මරණ දඬුවම අවලංගු කරයි!
සෞදි අරාබියේදී අනෝජන් සිවරාසා නමැත්තාට පනවා තිබූ මරණ දඬුවම අවලංගු කිරීමට එරට ශ්‍රේෂ්ඨාධිකරණය පියවර ගෙන ඇති බව විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා සිය නිල ෆේස්බුක් පිටුවේ සටහනක් තබමින් තහවුරු කර තිබේ.
ඊයේ (13) දිනයේදී මෙම තීරණය ගෙන ඇති අතර, ශ්‍රී ලංකා රජය විසින් අඛණ්ඩව සිදුකළ රාජ්‍යතාන්ත්‍රික හා නීතිමය මැදිහත්වීම්වල ප්‍රතිඵලයක් ලෙස මෙය සැලකෙන බව නියෝජ්‍ය අමාත්‍යවරයා සඳහන් කර ඇත.
සෞදි අරාබි රජය ලබාදුන් සහයෝගය වෙනුවෙන් කෘතඥතාව පළ කර ඇති නියෝජ්‍ය අමාත්‍යවරයා, විදේශ කටයුතු අමාත්‍යාංශය, ශ්‍රී ලංකා තානාපති කාර්යාලය, විදේශ සේවා නියුක්ති කාර්යාංශය ඇතුළු අදාළ නිලධාරීන් සහ නීති කණ්ඩායම් දැක්වූ කැපවීම විශේෂයෙන් අගය කර තිබේ.