ත්‍රස්තවාදය වැළැක්වීමේ පනත මේ වසරේ සිට අහෝසි කරනවා – ජනාධිපති
1979 අංක 48 දරන ත්‍රස්තවාදය වැළැක්වීමේ (තාවකාලික විධිවිධාන) පනත මේ වසරේ සිට අහෝසි කිරීමට පියවර ගන්නා බව ජනාධිපති අනුර කුමාර දිසානායක පවසයි.
ජනාධිපතිවරයා මේ බව සඳහන් කළේ අද (25) පාර්ලිමේන්තුව අමතමින්.
එහිදී වැඩිදුරටත් අදහස් දැක්වූ ජනාධිපතිවරයා සඳහන් කළේ, එම පනත අහෝසි කර සංවිධානාත්මක අපරාධ සම්බන්ධයෙන් වන සංශෝධනවලට යටත්ව නව පනතක් ඉදිරියේදී හඳුන්වා දීමට කටයුතු කරන බවයි.
1979 වසරේ ජුලි මස 20 වැනිදා එවකට පැවති රජය විසින් මෙම 1979 අංක 48 දරන ත්‍රස්තවාදය වැළැක්වීමේ (තාවකාලික විධිවිධාන) පනත මුලින්ම හඳුන්වා දෙනු ලැබීය.
ඉන් අනතුරුව, පසුගිය 2022 මාර්තු මස 29 වැනි දින එවකට පැවැති රජය විසින් මෙම පනතේ සංශෝධනයක් සිදුකරමින්, එය 2022 අංක 12 දරන ත්‍රස්තවාදය වැළැක්වීමේ (තාවකාලික විධිවිධාන) (සංශෝධන) පනත ලෙසින් ගැසට් පත්‍රයක් මඟින් ප්‍රකාශයට පත් කිරීමට පියවර ගෙන තිබිණි.