රාජ්‍ය සේවයට එක්වූ සැමගේ විශ්‍රාම වැටුප් හිමිකම තහවුරු කිරීමේ තීරණයක්
2016 වසරෙන් පසු රාජ්‍ය සේවයට එක්වූ සියලුම නිලධාරීන් සඳහා විශ්‍රාම වැටුප් හිමිකම තහවුරු කිරීමට කැබිනට් මණ්ඩලය තීරණය කර ඇති බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පවසයි. රාජ්‍ය සේවකයින්ගේ අනාගත සුරක්ෂිතතාව වෙනුවෙන් ගත් මෙම තීරණය පිළිබඳව අමාත්‍යවරයා අනාවරණය කළේ නව පත්වීම් ලිපි ප්‍රදානය කිරීමේ උත්සවයකට එක්වෙමිනි.
සෞඛ්‍ය හා ජනමාධ්‍ය අමාත්‍යාංශයේදී පැවති මෙම උත්සවයේදී නව දන්ත කාර්මික ශිල්පීන් ඇතුළු සෞඛ්‍ය නිලධාරීන් පිරිසකට පත්වීම් ලිපි ප්‍රදානය කෙරුණි. දන්ත කාර්මික ශිල්පී පුහුණුව සාර්ථකව නිම කළ 13 දෙනෙකු ඇතුළු පිරිසක් මෙහිදී නව පත්වීම් ලබාගත් අතර, මෙම අවස්ථාවට නියෝජ්‍ය අමාත්‍ය වෛද්‍ය හංසක විජේමුණි මහතා ද එක්ව සිටියේය.
මෙහිදී වැඩිදුරටත් අදහස් දැක්වූ අමාත්‍යවරයා අවධාරණය කළේ, රාජ්‍ය සේවයේ පවතින පුරප්පාඩු පිරවීමේදී අත්‍යවශ්‍ය බඳවා ගැනීම් නිසි නිර්ණායකයන්ට යටත්ව සිදු කිරීමට රජය කැපවී සිටින බවයි. විශ්‍රාම වැටුප් හිමිකම පිළිබඳ ගත් නව තීරණය රාජ්‍ය සේවකයින්ගේ වෘත්තීය අභිමානය ඉහළ නැංවීමට හේතුවනු ඇති බවද ඔහු පෙන්වා දුන්නේය.