පරිසරය-ආගම පෙන්වා දේශපාලන කුමන්ත්‍රණයක් සිදු වෙනවා! අලුත් ඇත් අතුරු සෙවණක් පොළොන්නරුවේ අරඹනවා – පරිසර ඇමැති වෛද්‍ය දම්මික පටබැඳි
වන අලි ඇතුන් පිළිබඳව පසුගිය දිනවල ඇති වූ කතාබහ සහ ඒ පිළිබඳව පරිසර අමාත්‍යාංශය පාර්ශ්වයෙන් ගෙන ඇති පියවර මොනවාද? පරිසර ගැටලු සහ ආගමික සහ ජාතිකත්වය දේශපාලනය වෙත ඈඳා ගනිමින් රට තුළ දේශපාලන අස්ථාවර භාවයක් ඇති කිරීමට විපක්ෂය දරන උත්සාහය පිළිබඳව පරිසර ඇමැති වෛද්‍ය දම්මික පටබැඳි මහතා සමඟ සිදුකළ සාකච්ඡාවකි මේ.
අලුත් ඇත් අතුරු සෙවණක් ආරම්භ කිරීම පිළිබඳව සඳහන් වෙනවා. මේ ගැන පැහැදිලි කිරීමක් කළ හැකිද?
අනතුරට පත්වන අලි – ඇතුන් සහ විශේෂයෙන්ම අනතුරට පත්වන අලි පැටවු සුවපත් කරලා නැවත වනාන්තරවලට මුදාහරින වැඩසටහන සිදුවන්නේ උඩවලව ඇත් අතුරු සෙවණේ. එතකොට දැන් අපේ රටේ වනාන්තර රට පුරා විසිරිලා තියෙනවා. ඉතින් විශේෂයෙන්ම පොළොන්නරුව අනුරාධපුර, උතුර වැනි පළාත්වල අනතුරට පත්වන ඇත් පැටවුන් සහ අලි – ඇතුන් අපිට උඩවලවට ප්‍රවාහනය කරන්න වෙනවා. ඒ නිසා ඒකට විශාල කාලයක් යනවා. එහිදී තුවාල ලබා ඉන්න අලියා අමතර අවදානමකටත් පාත්‍ර වෙනවා. ඒ නිසා තමයි අපි කල්පනා කළේ ලංකාවේ අනිත් පැත්තට, දකුණට වෙන්න තියෙනවා වගේ උතුරට වෙන්නත් මෙවැනි ඇත් අතුරු සෙවණක් තිබීම වැදගත් කියලා.
ඒ අනුව තමයි අපි පොළොන්නරුව දිස්ත්‍රික්කයේ වන සංරක්ෂණ දෙපාර්තමේන්තුව යටතේ තියෙන රක්ෂිතයක් මේ ඇත් අතුරු සෙවණ ගොඩනැඟීම සඳහා නිදහස් කර තිබෙන්නේ. ඒ අනුව ඉදිරියේදී පොළොන්නරුව දිස්ත්‍රික්කයේ දිසාපතිතුමන් වගේම එහි ප්‍රාදේශීය අධිකාරිය සහ වනජීවී සංරක්ෂණ දෙපාර්තමේන්තුව මැදිහත් වෙලා දැනටමත් මේකට අදාළ මූලික සංකල්පය සහ සැලැස්ම හදලා අවසන් කරලා තියෙනවා. ඒ නිසා ලබන වසරේදී මේ ඇත් අතුරු සෙවණ පොළොන්නරුව දිස්ත්‍රික්කය පදනම් කරගනිමින් ආරම්භ කිරීමට නියමිතව තිබෙනවා.
ආරක්ෂා කළ යුතු ඇතුන් 13 දෙනෙක් සම්බන්ධව හමුදා ආරක්ෂාව සපයන බව සඳහන් වනවා. ඇත්තෙන්ම ඒ වැඩපිළිවෙළ මොකක්ද? ඒ ගැන පැහැදිලි කිරීමක් කළ හැකිද?
ඔව්, ඒක ගත්තොත් මෙහෙමයි. අපේ රටේ සාමාන්‍ය ජනතාව අතර අලි – මිනිස් ගැටුම කියන එක තීව්‍ර වෙලා තියෙන ප්‍රශ්නයක්. මේකෙදී විශේෂයෙන්ම අපේ රටේ සම්පතක් වන අලි – ඇතුන් මියයෑමේ අවදානම වැඩි වෙලා තියෙනවා. අපිට මේ අපේ රටේ අලි ඇත් පරපුර රැක ගැනීම වැදගත් වෙනවා.
ඉතින් අපේ රටේ දැනට හඳුනාගත් සතුන් සංඛ්‍යාවක් ඉන්නවා. වනජීවී දෙපාර්තමේන්තුව සතුව සහ වයිල්ඩ් ටස්ක් වැනි ස්වේච්ඡා සංවිධාන සතුව. එතකොට දැන් අපි ඔවුන් හඳුනාගෙන තියෙනවා මේ ඇතුන් අතරින් අවදානමට ලක්වෙච්ච ඇතුන් කවුද කියලා. අලි 13 දෙනෙක් නම් හැටියට හඳුනාගෙන තියෙනවා. එතකොට මේ ඇතුන් ආරක්ෂා කරගැනීම සඳහා අපි විශේෂ වැඩපිළිවෙළක් පසුගියදා ආරම්භ කළා. ඒ සඳහා පරිසර අමාත්‍යාංශය, වනජීවී සංරක්ෂණ දෙපාර්තමේන්තුවත් ත්‍රිවිධ හමුදාවත් විශේෂ සාකච්ඡාවක් කළා. මේ සාකච්ඡාවට සම්බන්ධ වුණා වයිල්ඩ් ටස්ක් ආයතනයත්. අපි ඔවුන්ගෙනුත් ඔවුන්ගේ තියෙන දත්ත පත්‍රිකාව පදනම් කරගෙන මේ විශේෂ වැඩපිළිවෙළ හැදුවා.
එතකොට මේකෙදී කෙරෙන්නේ හමුදා මෙහෙයුම් මූලස්ථානයක් හැටියට සලකමින්, නාවික හමුදාව, ගුවන් හමුදාවත් සම්බන්ධ කරගනිමින්, ඒ වගේම වනජීවී සංරක්ෂණ දෙපාර්තමේන්තුවත්, පරිසර අමාත්‍යාංශයත් සම්බන්ධ කරගනිමින් මේ අලි දහතුන්දෙනා ගැවසෙන ප්‍රදේශ අපි හඳුනගෙන තියෙනවා. ඒ ප්‍රදේශවල හමුදා අනුඛණ්ඩ දහතුනක් දාහතරක් වගේ ප්‍රමාණයක් මේ වෙනුවෙන්ම යොදවා අවශ්‍ය අවස්ථාවේදී ක්ෂණික මැදිහත්වීම සිදු කිරීම තමයි මේකෙන් බලාපොරොත්තු වෙන්නේ. ඉතින් මේ සඳහා අපි ඒ මෙහෙයුම් මධ්‍යස්ථානයක් හදලා තියෙනවා. මේ මෙහෙයුම් මධ්‍යස්ථානයට සම්බන්ධ කරලා තියෙනවා ත්‍රිවිධ හමුදාවත්, අපි හඳුනාගත් අලි දහතුන් දෙනා සැරිසරන ප්‍රදේශවල වනජීවී නිලධාරීන්, ඒ වගේම වයිල්ඩ් ටස්ක් ආයතනයත් මේ සම්බන්ධයෙන් සම්බන්ධීකරණය කරගනිමින් මේ වැඩපිළිවෙළ ඉදිරියට කරගෙන යනවා.
මේ සඳහා මහජන සහභාගිත්වය සහ සහාය ලබාගන්නේ කොහොමද ?
ඔව්, මේකෙදී අපි බලාපොරොත්තු වෙනවා, විශේෂයෙන්ම මේ ප්‍රදේශවල තියෙන ස්වේච්ඡා සංවිධාන ඒ වගේම ප්‍රජා සංවර්ධන සභා නියෝජිතයෝ හරහාත් අපි තොරතුරු රැස් කරගන්නවා. ඊට අමතරව වයිල්ඩ් ටස්ක් ආයතනය පැත්තෙනුත් ඔවුන් සතුව තියෙන පරිසරවේදීන් විශේෂයෙන්ම අලි ඇතුන් සම්බන්ධයෙන් කැමැත්ත දක්වන පිරිස් සම්බන්ධ කරගනිමින් සම්බන්ධීකරණයක් ඇති කරනවා. අන්න ඔවුන්වත් අපි මේකෙදී සම්බන්ධීකරණය කරගන්නවා. බිම් මට්ටමේදී, අවශ්‍ය මැදිහත්වීම සිදු කරනවා.
කාවන්තිස්ස හස්තියාගේ සිද්ධියේදී දැන් විපක්ෂය ලොකු ද්වේශ සහගත දේශපාලන වශයෙන් ලොකු උත්සාහයක් ගත්තා මේකත් ආණ්ඩු විරෝධී සටන් පාඨයක් කරගන්න. ඇත්තෙන්ම විපක්ෂය මේ කටයුතු කරන්නේ ඇයි, ඔබතුමා ඒ ගැන මොකද හිතන්නේ ?
ඔව්, ඇත්තටම අපි කනගාටු වෙනවා කාවන්තිස්ස හස්තියාගේ ඇතිවෙච්ච රෝගී තත්ත්වයෙන් සුවපත් කරගන්න නොහැකි වීම සම්බන්ධයෙන්. කාවන්තිස්ස හස්තියා අපේ රටේ ජාතික වස්තුවක් හැටියට තමයි අපි සැලකුවේ. ඒ නිසා ඔහු ගැන විමසිල්ලෙන් ඉන්න අපි විශේෂ වනජීවී කණ්ඩායමක් යොදවලා තිබුණා. එතකොට ඔහුගේ රෝගී තත්ත්වය දැනගත් මොහොතේ සිට ඒ සඳහා මැදිහත්වීම් කරලා තියෙනවා. වෙන කිසිදු හස්තියකුට මැදිහත් නොවුණු තරම් අපි මේ හස්තියාගේ ජීවිතය බේරා ගැනීම සඳහා මැදිහත් වුණා.
නමුත් අපට ඔහුගේ ජීවිතය බේරා ගැනීමට නොහැකි වුණු එක සම්බන්ධයෙන් අපි කනගාටු වෙනවා. නමුත්, ඒ අතරෙන්ම මේ සිදුවීම පාදක කරගෙන දැවැන්ත ප්‍රචාරක සහ උද්ඝෝෂණ කැම්පේන් එකක් අරගෙන ගියා. එතකොට මේ සම්බන්ධයෙන් හදපු මතවාද ප්‍රමාණයක් තියෙනවා. මේ මතවාද ගත්තොතින් ඒවා තුළ තියෙනවා ප්‍රධාන මතවාද ධාරාවන් කීපයක්. මේවා තුළ තියෙනවා අවිද්‍යාත්මක මත, මිථ්‍යා මත, සමහර පුද්ගලයන් ඉලක්ක කරගත් ද්වේශ සහගත ප්‍රචාරයන්, සමාජය කැලඹීමට ලක්කළ හැකි ආකාරයේ ප්‍රචාරක දේවල්, ඊට පස්සේ මේක ඇතුළේ තියෙනවා දේශපාලන වුවමනා නියෝජනය වන ප්‍රචාරයන්.
ඒ නිසා දැන් මේ සිදුවීම පදනම් කරගෙන විවිධ කණ්ඩායම් මේ කාවන්තිස්ස හස්තියාගේ වියෝවෙන් කම්පනයට පත්වෙලා ඉන්න ජන කොටස්, ඔවුන්ගේ වුවමනා සඳහා යොදාගන්න උත්සාහ කරනවා. මේක දේශපාලනික වශයෙන් යොදාගන්න උත්සාහ කරනවා, සමහර මිථ්‍යා මත ප්‍රවර්ධනය සඳහා යොදාගන්නවා, සමහර පුද්ගලයන්ට ද්වේශ සහගත චෝදනා එල්ල කිරීම සඳහා යොදාගන්නවා, මේක හරහා තමන්ගේ වැරදි අඩුපාඩු මකාගන්න වගේ උත්සාහ ගන්නවා. ඒ නිසා මේක ඇතුළේ විවිධ පරමාර්ථ සහිතව තමයි මේ කැම්පේන් කියන්නේ. ඉතින් ඒ නිසා අපි මේකෙන් ඉල්ලන්නේ මේ අවස්ථාව ප්‍රයෝජනට ගන්න ඕන අලි – ඇතුන් සම්බන්ධයෙන් විද්‍යාත්මක දැනුම ප්‍රවර්ධනය කරගන්න, අලි ඇතුන් සංරක්ෂණය මීට වඩා ඵලදායී, කිසියම් අඩුපාඩුවක් සිද්ධ වුණා නම් අන්න ඒවත් සමාලෝචනය කරගෙන මීට වඩා ඵලදායී තැනකට මේක වර්ධනය කරගැනීම සඳහා මේ අත්දැකීම පාවිච්චි කරගන්නවා වෙනුවට, මේක ඉතාම පටු පරමාර්ථ සඳහා පාවිච්චි කරගෙන ඉන්නවා.
අන්න ඒ පටු පරමාර්ථ ඉටුකර ගැනීම සඳහා මේ වියෝවෙන් කම්පනයට පත්වෙච්ච ජනතාව, සමාජ කණ්ඩායම් යොදා ගනිමින් තියෙනවා. ඉතින් අන්න ඒක තමයි අපි මේකේ තියෙන ගැටලුව හැටියට දකින්නේ. එහෙම නැත්නම් අපි කවුරුත් මේ හස්තියාගේ වියෝව සම්බන්ධයෙන් ඒ කම්පනයක්, කනගාටුවක් ඇතිවුණු දෙයක්. ඉතින් අපි ඉල්ලා සිටිනවා මේක දඩබිමක් කරගෙන අවිද්‍යාව පතුරන්න, මිථ්‍යා මතවාදයන් පතුරන්න, විවිධ පුද්ගලයන්ට ද්වේශ සහගතව කටයුතු කරන්න, එහෙම නැත්නම් මේක දේශපාලනික අරමුණක් සඳහා යොදාගැනීම වැනි පටු පරමාර්ථවලට මේක යොදාගන්න සමහරු පාවිච්චි කරගෙන ඉන්නවා. ජාතික කාර්යය වුවමනාවටත්. මේ වෙලාවේ ඒ නිසා අපි ඉල්ලා සිටින්නේ එවැනි දේවල් සඳහා මේක පාවිච්චි කරගන්නේ නැතුව මේ කම්පනය, මේ අත්දැකීම පාවිච්චි කරගමු කියලා අපි යෝජනා කරනවා, අපේ රටේ අලි – ඇතුන් සංරක්ෂණය මීට වඩා ඵලදායි තැනකට ගෙන යන්න.
ඒ අතරම මේ අවස්ථාවේ ජාතිවාදී, ආගම්වාදී සටන් පාඨත් ආණ්ඩුවට විරුද්ධව ඇතැමුන් සිදු කරගෙන යනවා. ඒ ගැන ඔබතුමාගේ අදහස මොකක්ද ?
මේ මොහොත ගත්තොතින් අපේ රටේ අලුත් ආරම්භයක් ලබලා තියෙන මොහොතක්. මේ ආරම්භය ලබලා තියෙන්නේ මොන පැතිවලින්ද? එක පැත්තකින් අපි අපේ රටේ ආර්ථික ස්ථාවරභාවය ගොඩනඟමින්, අපි අභියෝග මැද රටේ ජන ජීවිතය යථාවත් කරමින් ඉන්න මොහොතක්, ඒ වගේම අපි අපේ රටේ වංචාව, දූෂණයට එරෙහිව දැවැන්ත වැඩපිළිවෙළක් ක්‍රියාත්මක කරලා මහජන මුදල් මංකොල්ල කෑ අයට එරෙහිව නීතිය ක්‍රියාත්මක වීමට නියමිත මොහොතක්. ඒ වගේම තමයි අපේ රටේ මත්ද්‍රව්‍ය ජාවාරම සහ පාතාලය මර්දනය කිරීම සඳහා රජයක් හැටියට වෙන කිසිදු රජයකින් කටයුතු නොකරපු තරම් මැදිහත්වීමක් කරලා තියෙන වෙලාවක්. අපට පේනවා මෙන්න මේ ක්‍රියාවලිය ආපසු හැරවීම සඳහා වුවමනාව තියෙන කණ්ඩායම්, ඔවුන්ගේ සැබෑ අරමුණ හංගගෙන ඔවුන් මතුපිටට ගෙනෙනවා මේක බුදු දහමේ ප්‍රශ්නයක් හැටියට අර්ථ දක්වමින්, සමහර සිදුවීම් පාරිසරික ප්‍රශ්න ලෙස මතුපිටට ගෙනෙමින්, සමහර සිදුවීම් මේකේ නීතිමය මොනවාහරි ගැටලු හැටියට මතුපිටට ගෙ‍ෙනමින්, ආණ්ඩුව ගෙනයන සාධනීය වැඩපිළිවෙළ ආපසු හැරවීමට ක්‍රියා කරනවා. වංචා, දූෂණ, පාතාල ක්‍රියාකාරකම්, මත්ද්‍රව්‍ය ජාවාරම් හසුව තිබෙන සැකකරුවන් අත්අඩංගුවට පත්වෙමින් තිබෙනවා. ඔවුන් නැවත නිදහස් වීම සඳහා අවශ්‍ය කරන පසුබිම සකසා ගැනීම සඳහා තමයි මෙවැනි උත්සාහයන් සිදු කරන්නේ.
ඉතින් අපි දන්නවා මෙවැනි කැම්පේන්වලට විවිධ සැක සහිත කණ්ඩායම් විශාල වශයෙන් මුදල් පොම්ප කරලා තියෙනවා. ඒවට මුදල් පොම්ප කරමින් තමයි මේ කටයුත්ත සිදු කරන්නේ. ඉතින් මේවට ජනතා සහයක් ලැබෙන බවක් අපට පෙනෙන්න නැහැ, ගොඩක් අඩුයි. මේවා ඇතුළේ ජනතාවගේ සහය ලබාගන්න ඔවුන්ට බැරි වෙලා තියෙනවා. නමුත් ඔවුන් මේවා මිල මුදල් වැය කරලා, ධනය වැය කරලා සිදු කරන දේවල් බවට පත්වෙලා තියෙනවා. ඉතින් අපි මේ රටේ ජනතාවගෙන් ඉල්ලන්නේ මේ වැනි කුමන්ත්‍රණකාරී කැම්පේන්වලට හසුවෙන්න එපා කියන එකයි. මේ තත්ත්වය නිවැරදිව තේරුම් ගනිමින් කටයුතු කරමු කියන යෝජනාව තමයි මට තියෙන්නේ.