ශ්‍රිලනිප ඇමතිවරුන් 6 දෙනා ඉල්ලා අස්වීමෙන් පුරප්පාඩු වූ කැබිනට් ඇමතිධුර එම පක්ෂයටම.

අග්‍රාමාත්‍ය රනිල් වික්‍රමසිංහ මහතාට එරෙහි විශ්වාසභංග යෝජනාවට පක්ෂව ඡන්දය දුන් අමාත්‍යවරුන් ඉල්ලා අස්වීමෙන් පුරප්පාඩු වූ කැබිනට් අමාත්‍යධුර හය කැබිනට් සංශෝධනයේදී ශ්‍රී ලංකා නිදහස් පක්ෂයේ රාජ්‍ය හා නියෝජ්‍ය අමාත්‍යවරුන් කිහිප දෙනෙකුට හිමි වනු ඇති බව වාර්තා වනවා.

කැබිනට් මණ්ඩලයේ සංශෝධනයක් අද හෙටම සිදු කරන බව ජනාධිපති මෛත්‍රීපාල සිරිසේන මහතා ප්‍රකාශ කර ඇති අතර එහිදී ශ්‍රීලනිප මන්ත්‍රීවරුන්ට මෙම ඇමැති ධුර පිරිනැමෙනු ඇති බව ද පැවසේ.

ශ්‍රී ලංකා නිදහස් පක්ෂයේ ඇමැති හෝ නියෝජ්‍ය ඇමැති දුරයක් හිමිවී නොමැති අංගජන් රාමනාදන් හා කාදර් මස්තාන් යන මන්ත්‍රීවරුන්ට ද රාජ්‍ය ඇමැතිධුර හෝ නියෝජ්‍ය ඇමැති ධුර හිමිවනු ඇතැයි වාර්තාවේ.

විශ්වාස භංග යෝජනාවේදී ඡන්දය දීමෙන් වැළකී සිටි ශ්‍රීලනිප මැති ඇමැතිවරු 26 දෙනෙක් ආණ්ඩුව සමග එක්ව කටයුතු කරති.

ඉන් පිරිසක් ජනාධිපතිවරයා සමගත් අගමැතිවරයා සමගත් ඊයේ පස්වරුවේ වෙන වෙනම  සාකච්ඡා පවත්වා ඇත.

මෙම සාකච්ජා වලදී එජාපයට හා ශ්‍රීලනිපයට වෙන් කර ගෙන ඇති ඇතැම් අමාත්‍යංශ සංශෝධනය කිරීම සම්බන්ධයෙන් ද අදහස් හුවමාරු කර ගෙන ඇතැයි වාර්තා වේ.